Tətilə necə hazırlaşaq ki, sonra pulu boşuna xərclədiyimiz üçün heyfislənməyək? Tətili planlaşdırarkən pula qənaət etmək üçün istifadə edə biləcəyimiz üsullardan danışaq.

Öncədən rezervasiya et

Məzuniyyətə çıxacağın tarix bir neçə ay öncədən bəllidirsə, son anı gözləmədən otel, bilet və tur paketlərini öncədən rezervasiya et. Böyük otellər və tur operatorlar adətən erkən rezervasiya edənlər üçün böyük endirimlər edirlər. Təyyarə və qatar biletlərini də 30-50% daha ucuz əldə edə bilərsən.
Yaşayış yeri seçiminə gəldikdə isə, nəzərində olsun ki, gözəl və ucuz olan kiçik otellərdə otaqlar mövsüm başlamazdan əvvəl satılıb bitir.

Bütün yığdığın pulları tətildən 6 ay əvvəl xərcləmək vacib deyil. Otellərin əksəriyyəti rezervasiyanın zəmanəti olaraq kartının nömrəsini götürür, lakin pulunu dərhal çıxmır. Rezervasiyanı cərimə ödəmədən ləğv etmək imkanı verən kifayət qədər otel var. Amma ən yaxşısı rezervasiyanı əlavə ödəniş etmədən ləğv edilməsinin son tarixini öyrənməkdir. Düzdür, rezervasiyanı ləğv etmək imkanı olmayan variantlar adətən daha ucuz olur. Buna görə də, bütün müsbət və mənfi cəhətləri əvvəlcədən qiymətləndirmək daha məqsədəuyğundur.

Seçdiyin otelin rəsmi saytında və müxtəlif bron sistemlərində göstərilən qiymətləri müqayisə et. Tur operatorların təkliflərini araşdır. Bəzi tur operatorlarına mehmanxanalar tərəfindən paket endirimləri təqdim olunur ki, bu da eyni otaq üçün ayrı-ayrı tur operatorların təklif etdiyi qiymətlərdə fərq yaradır. Aviaşirkətlərin saytlarında və müxtəlif operatorların təklif etdiyi aviabiletlərin qiymətini müqayisə etmək də yaxşı olar. Lakin biletlərin qiymətinə digər yollarla da qənaət edə bilərsən.

Bəzi banklar təyyarə biletləri üçün mil yığmaq imkanını verən kartlar buraxır. Lakin bu milləri bank seçimindən asılı olaraq müvafiq avia şirkətlərdən əldə etmək olar.

Böyük tur operatorlar çox vaxt taksit planlarını da təklif edirlər: rezervasiya etdiyində turun qiymətinin yarısını ödəyib, digər hissəsini isə səyahətdən iki həftə və ya bir ay öncə ödəyə bilərsən. Adətən bu halda tur paketinin qiyməti sabit olaraq qalır, valyuta məzənnəsi dəyişsə belə.

İmkan varsa, son ana qədər uzat

Cəld tərpənirsənsə, risk etməkdən qorxmursansa və tətil planlarını dəyişməyə hazırsansa, o zaman qaynar turlara nəzər sal. Uçuşdan bir neçə gün əvvəl (və ya ölkəyə daxil olmaq üçün viza lazımdırsa, bir neçə həftə əvvəl) turların qiymətləri 20-30% ucuzlaşa bilər.

Böyük otellər, xüsusilə də otel şəbəkələri, yaxın tarixlərə boş yerlər qaldıqda qiymətləri kəskin şəkildə aşağı sala bilərlər. Belə təkliflərdən yararlanaraq üçulduzlu otel qiymətinə dəbdəbəli beşulduzlu oteldə qala bilərsən.

Amma biletləri nadir hallarda ucuz qiymətə almaq olur. Uçuş ərəfəsində adətən yalnız bahalı biletlər və əlverişsiz reyslər qalır.

Bütün xərcləri nəzərə al

Yaşayış yerini yalnız qiymətinə görə seçmə. Sizi gözləyən bütün xərcləri nəzərə almağa çalışın. Məsələn, mənzil tutmaq adətən oteldə qalmaqdan daha ucuz başa gəlir. Lakin gedəcəyin ölkədə ərzaq məhsullarının qiyməti bahalıdırsa, o zaman “hər şey daxil” paketi üçün ödədiyiniz eyni məbləği yeməyə xərcləyə bilərsiniz.

Şəhərin kənarında yerləşən mehmanxanalar mərkəzdə yerləşən mehmanxanalardan daha ucuz başa gəlir, lakin şəhərin görməli yerlərinə getmək üçün nəqliyyata çoxlu vaxt və pul xərcləməli olacaqsan.

Və əksinə, icarəyə avtomobil götürməyi planlaşdırırsansa, mərkəzdə yerləşən bahalı mehmanxanada qalmağın bir mənası yoxdur. Avtodayanacaqla da bağlı problemlər ola bilər. Onun qiymətini də əvvəlcədən öyrənmək məqsədəuyğundur.

Üstündə valyuta götür

Hava limanında qaçaqaçla valyutanı dəyişmək o qədər də yaxşı fikir deyil. Adətən hava limanlarında ən əlverişsiz məzənnə olur, üstəlik mübadilə üçün komissiya da tutulur.

Ən yaxşısı əvvəlcədən bütün valyuta mübadiləsi üsullarını araşdırıb sənə uyğun olanını seçməkdir.

Gözlənilməz xərclərə hazır ol

Əlbəttə ki, tətil büdcəsini əvvəlcədən hesablamaq və ondan kənara çıxmamaq daha yaxşı olar. Lakin səyahət zamanı baş verə biləcək xoş və xoşagəlməz sürprizləri də nəzərə almaq lazımdır.

Avtomobil icarəsi üçün çox vaxt depozit tələb olunur. Avtomobili gec, benzin bakı boş şəkildə və ya oturacaqlarında dondurma ləkələri ilə qaytarsan, həmin depozit sənə tam şəkildə qaytarılmayacaq (və ya heç qaytarılmayacaq). Sığorta bir qayda olaraq dəymiş ziyanı tam qarşılamır. Beləliklə, maşını cızsan, bunun üçün ödəniş etməli olacaqsan. İcarə ofisində sənə tam sığortanın verilməsini tələb edə bilərsən, lakin bu, standart sığortadan baha başa gələcək.

Mehmanxanalar da sənin nəyəsə ləkə salmaq və ya qırmaq ehtimalını nəzərə alaraq çox vaxt depozit götürürlər. Bundan əlavə, uşaq restoranda bahalı torşeri qıra bilər, hava yolu şirkəti isə baqajını başqa ölkəyə göndərə bilər.

Xoş sürprizlərlə də qarşılaşa bilərsən. Məşhur müğənninin konsertinə və ya sevdiyiniz futbol komandasının oyununa getmə şansın yarana bilər.

Sığortalan

Tətildə xəstələnsən, bu sənin büdcənə pis təsir edə bilər. Tibbi xidmətlər hər yerdə bahalıdır, və sənin pulun onları qarşılamaq üçün çatmaya bilər. Eyni zamanda, istirahət üçün ayırdığın pulu həkimlərə xərcləmək heç kim istəməz. Buna görə də, sığortadan imtina etmək və onu sadəcə viza almaq üçün tələblərdən biri olaraq hesab etmək düzgün olmaz.

Nəzərə al ki, tur paketlərə daxil olan sığorta növü ən optimal variant olmaya bilər. Bir neçə sığorta şirkətinin təklifləri ilə tanış olaraq sənə uyğun olan variantı seçmək məqsədəuyğundur.

Adətən premium bank kartlarının xidmət paketinə sığorta təminatı daxil olur. Bankınızdan məlumat alın: bəlkə də, sənə təlimatı ödənişsiz olaraq və ya endirimlə təqdim edə bilərlər. Və bu halda qarşılanan məbləğ standart səyahət sığortası ilə müqayisədə daha yüksək ola bilər.

Yol puluna qənaət et

İctimai nəqliyyatda çamadanlarla səyahət hər zaman ən rahat və ən ucuz seçim deyil. Evdən hava limanına və hava limanından otelə necə çata biləcəyin bütün variantları nəzərdən keçirmək daha yaxşı olar. Ailəlikcə tətilə gedirsənsə, Aeroexpress-də əldə etdiyin biletlər və ya səyahət agentliyinin təşkil etdiyi nəqliyyat taksidən daha baha başa gələ bilər.

Hava limanlarının yaxınlığında çox vaxt avtomobilini bir neçə günlük saxlaya biləcəyin avtodayanacaq olur. Qısa müddətə gedirsənsə, bu, taksidən istifadə etməkdən daha ucuz ola bilər. Bu dayanacaqlarda adətən uçuş zonasına pulsuz daşınma mövcuddur. Üstəlik, bu, avtomobilini evinin yanındakı mühafizə olunmayan dayanacaqda saxlamaqdan daha təhlükəsizdir.

Bəzi şəhərlərdə karşerinq xidmətindən istifadə edib kiçik ödəniş qarşılığında bir neçə saatlıq avtomobil icarəyə götürüb, onunla hava limanına gedib orada saxlamaq olar. Bu halda dayanacaq üçün pul xərcləməli olmayacaqsan.

Tətil zamanı belə qənaət etmək və hətta pul qazanmaq mümkündür.