Əmək məcəlləsinə uyğun olaraq işləməyin ən gözəl tərəflərindən biri də odur ki, məzuniyyətə çıxdığımızda kartımıza məzuniyyət haqqı köçürülür. Lakin səyahət zamanı pul çox tez xərclənir və sonra maaşa qədər əlavə pula ehtiyac yaranır. Tətil zamanı necə pul qazanmaq və qənaət etmək olar? İpucuları səninlə paylaşırıq.

Bağlamaların çatdırılması

“Dostlar, təcili! Bu yaxınlarda Bakıdan İstanbula gedən var? Bağlama çatdırılmalıdır”, - yəqin sən də tanışlarının sosial şəbəkə hesablarında belə elanlarla rastlaşmısan. Əlbəttə ki, belə bir xidmət ödəniş qarşısında həyata keçirilir.

Kiçik bir bağlamadırsa, yaxınlarına ödənişsiz şəkildə kömək edə bilərsən. Lakin digər insanlardan bunun üçün müəyyən qarşılıq istəyə bilərsən. Məsələn, hava limanına/limanından taksi, pul mükafatı, avtomobillə şəhər turu və s.

“Müştərinin” tapılmasının ən asan yolu sosial şəbəkələrdə və tanışların arasında elan paylaşmaqdır. Mənfi tərəfi odur ki, yaxın çevrəndə olan insanların çatdırılmaya ehtiyacı olmaya bilər.

• Diqqət: Sərhəddən hansı malların keçirilə biləcəyini yoxla. Eləcə də icazə verilən çəki və miqdara diqqət et ki, sonra bununla bağlı problem yaşamayasan.

ƏDV və keşbek

Tax free, ölkədən asılı olaraq alış-verişlərin dəyərinin 10-30%-nə qənaət etmək imkanı verir.

ƏDV-nin geri qaytarılması zamanı nəyə diqqət etmək lazımdır:

• geri qaytarılmanın mümkün olduğu minimal çeki dəyəri. Bu məbləğ ölkədən ölkəyə fərqlənir;
• hansı məsullardan ƏDV geri qaytarıla bilər;
• mağaza tax free zonasına daxil olmalıdır;

Bəzi ölkələrdə ƏDV-ni gömrüyün xüsusi məntəqələrində, bəzilərində isə alış-veriş etdiyin gün şəhərdən çıxmadan geri qaytarmaq olur. Lakin yenə də gömrük yoxlanışından keçməli olacaqsan. Buna görə də, aldığın malları çamadanın dibinə qoyma ki, rahat çıxarıb gömrük işçilərinə göstərə biləsən.

Keşbek istənilən xərclərə qənaət etməyin əlverişli üsullarından biridir. Keşbek əldə etməyin ən etibarlı yolu yerli bankların əksəriyyətindən ala biləcəyin keşbek kartıdır. Belə bir kart sənə istənilən alış-verişlər, mənzil və biletlərin rezervasiyası xərclərinin 10%-nı geri qaytarmaq imkanı verəcək.

Mənzilin, avtomobilin və dayanacaq yerinin icarəsi

Tətil zamanı mənzilin, avtomobilin və hətta dayanacaq yerindən istifadə edərək pul qazana bilərsən. Necə? Onları icarəyə verə bilərsən.

Mənzil və avtomobildən söhbət gedirsə, burada hər şey nisbətən asandır: müəyyən saytlarda elan paylaşmaq kifayətdir. Eləcə də dostlarından və ya onların tanışlarından kiməsə icarəyə vermək olar, amma bu daha risklidir. Düşünə bilərsən ki, dostumun dostundan mənə nə zərər gələ bilər ki? Nəticədə isə, cızıq-cızıq olmuş avtomobil, yanmış divan və digər bu kimi hallarla rastlaşa bilərsən.

Avtomobil icarəsi xidməti göstərən şirkətlər isə nəqliyyatı sığortalayırlar. Bu, kiminsə sözünə güvənməkdən daha etibarlıdır.

Ödənişli dayanacaq yerini icarəyə vermək istəyirsənsə, qonşularına bunu təklif edə bilərsən. Bəlkə də, sənin avtomobillə səyahətdə olacağın müddətdə qonşularından kimsə Baliyə getməyi planlaşdırır və avtomobilini evin yaxınlığında saxlamağı düşünür. Bu halda sənin dayanacaq yerindən istifadə edə bilər.

Başqa nələri icarəyə vermək olar:

• bağ evini;
• velosiped və ya samokatı;
• texnikanı, məsələn, kompüter və ya kameranı;

Diqqət: Beh almağı və müqavilə bağlamağı unutma. Təbii ki, 100 manat məbləğində beh icarəyə verdiyin əşyanın dəyərini qarşılamır, lakin onu icarəyə götürən insan üçün əşyanı zərər dəyməmiş şəkildə geri qaytarmağa motivasiya ola bilər.

Həm ziyarət, həm ticarət: mehmanxanada əlavə iş

Düzdür, tətil zamanı əlavə işləyərək daha az istirahət etmiş olursan. Lakin digər tərəfdən bu halda sadəcə səyahət xərclərinə qənaət etmiş deyil, həm də pul qazanmış olursan.
Dəniz sahillərində və adalarda yerləşən otellərdə animator, hostess, rəqs qrupları, bələdçi, barmen, batler və s. kimi işçilər lazım olur. Otel yol, yaşayış xərclərini, əmək haqqını qarşılaya, və ya sadəcə hər növbə üçün sənə ödəniş edə bilərlər. Təbii ki, birinci variant daha sərfəlidir.
Tətildə minimum səylə əlavə gəlir qazanmaq gözəl bir bonusdur. Siyahıdan sənə ən uyğun variantı seç, lakin unutma ki, bir çamadan türk paxlavası gətirsən, yarısı sənə qalmalıdır!