Həyat dərsi: daha çox pul qazanmağına mane olan amilləri müəyyən et

Henri Ford deyirdi: “Yaşlılar hər zaman gənclərə pula qənaət etməyi məsləhət görür. Bu, pis bir məsləhətdir. Özünüzə yatırım edin. Mən 40 yaşıma qədər həyatımda bir dollara belə qənaət etməmişəm”. Biz şüursuz şəkildə pul və qənaətlə bağlı valideynlərimizin inanclarını mənimsəyirik. Amma onların bəzilərinin bizə mane olduğunu və pulumuzu artırmağımıza imkan vermədiyi haqda düşünmürük.

Cavanlıqda pul qazan, qocalıqda – qur, qazan

Kapitalı artırmaq üçün qənaət etmək taktikası zaman qədər qədimdir. Lakin o ancaq ilk baxışdan məntiqli gəlir: qənaət etmə üsullarına nə qədər çox diqqət yetirsək, pulu qazanmağın yolları haqqında bir o qədər az düşünürük. Özünə yeni bir köynək almağı çox görmə: illərlə özünü kiçik sevinclərdən məhrum etsən belə, əhəmiyyətli miqdarda pul toplaya bilməyəcəksən. Ondansa daha yüksək vəzifəyə keçmək və ya öz biznesini açmaq üçün sənə lazım olacaq bacarıqları inkişaf et.

Pul insanı korlayır

İnsanların zehinlərində hələ də xırdaçı prinsipsiz zənginə qarşı duran alicənab və mənəvi zəngin kasıbın obrazı yaşayır. Bir tərəfdən, bu, imkanı olmayan insanlar üçün yaxşı təsəllidir. Digər tərəfdən isə, daha çox pul qazanmağa imkan verməyən görünməyən bir maneədir.

Sanki gəlirimiz artdıqca yaxşı keyfiyyətlərimizi itirməkdən qorxuruq. Zənginlər insanın hesabındakı məbləğlə şəxsi xüsusiyyətləri arasında əlaqə görmürlər. Henri Ford deyirdi: “Pul insanı dəyişmir, sadəcə ifşa edir. Əgər insan təbiətcə eqoist, təkəbbürlü və xəsisdirsə, pul bu xüsusiyyətlərini daha da önə çəkir”.

Halal zəhmətlə pul qazanmaq olmur

Bəzi insanlar yalnız fırıldaqçılıq və intriqalar vasitəsilə zəngin ola biləcəklərinə inanırlar. Bəlkə də bir neçə əsr əvvəl bu belə idi. Amma müasir dünyada hər kəsin gəlirini artırmaq imkanı var.
2007-ci ildə İntgiltərəli Culi Din cəmi 600 funt-sterlinq kapitalı ilə “Cambridge Satchel Company” adlı əl çantası istehsalı şirkət açdı. O, “Harry Potter” filminin qəhrəmanlarının çantalarına bənzəyən dəri çantalar düzəltməyə qərar verdi. Qazandığı pulu uşaqlarını yaxşı bir məktəbə göndərmək üçün istifadə edirdi. Hal-hazırda şirkətin 120-dən çox mağazası var və şirkət “Vivienne Westwood” ilə əməkdaşlıq edir. Culinin özünü isə “Forbes” jurnalının səhifələrində görmək olar.

Dünyanın bütün pulunu qazanmaq olmaz

Bu ifadəni adətən çox işləmək istəməyən və ya çox işləməkdən qorxan insanlar istifadə edir. Ən çox sitat gətirilən milyonerlərdən biri olan Uorren Baffet hesab edir ki, yuxuda belə pul qazanmaq olar. Bu nə deməkdir? 7/24 və hətta 12 saat işləmək mütləq deyil. Qeyri-iş saatlarında pul qazanmağın üsulunu, yəni passiv gəlir mənbəyi tapmaq kifayətdir (məsələn, əmlakı icarəyə vermək və ya hobbini gəlir mənbəyinə çevirmək).

40 yaşına qədər qazana bilmədinsə, ondan sonra da qazana bilməyəcəksən

Uzun illər ərizində gənclikdə yanlış ixtisas seçdiyinə görə peşmanlıq hissi keçirə və ya lazımi əlaqələrinin olmamağından şikayət edə bilərsən. Və ya göstərdiyimiz bir neçə ilhamlandıran nümunəyə nəzər sala bilərsən: Sem Uolton Walmart-ı 44 yaşında təsis etmişdi. Çarlz Flint IBM-i yaradanda 61 yaşında idi.

İllər keçdikcə qayğılarımız çoxalır: ailə və uşaqlar vaxtımızın çox hissəsini alır, işdən sonra isə enerjimiz qalmır. Ancaq bu yaşın gənc yaşa nisbətən üstünlükləri də var: yığdığımız təcrübə, təmkin və riskin səmərəli qiymətləndirilməsi qabiliyyəti.

Xoşbəxtlik pulda deyil

Yazıçı Ziq Ziqlar demişdi: “Pul həyatda ən vacib şey deyil, amma ehtiyac dərəcəsinə görə oksigenə yaxındır”. Hesabında bir məbləğin olması özü-özlüyündə səni xoşbəxt etməyəcək. Lakin həmin puldan istifadə edib səni məmnun edəcək və həyat keyfiyyətini yaxşılaşdıracaq əşyalar ala biləcəksən.

Zəngin olmaq üçün imkanlı ailədə andan olmaq lazımdır

Sahibkar, xeyriyyəçi və Microsoft-un təsisçisi Bill Qeyts demişdi: “Əgər kasıb doğulmusansa, bu, sənin günahın deyil. Amma kasıb ölürsənsə, günah sənindir”. Biz çox vaxt düşünürük ki, zəngin insanların bəxti gətirib. Amma zəngin olan hər kəs uşaqlıqdan zəngin olmayıb.

Məsələn, məşhur aparıcı Opra Uinfrinin uşaqlığı ucqar kənddə kasıblıq içində keçmişdi. Lakin o, 17 yaşında ən gənc müxbir olmuşdu. Dünyanın ən zəngin insanlarından biri olan modelyer Ralf Loren uşaqlıqda böyük qardaşlarından qalan paltarları geyinməyə məcbur idi. Bu paltarlar onun yaradıcı enerjini və özünəməxsus bir şey yaratmaq istəyini oyadırdı.

Bir təhər dolanırıq, buna da şükür

Adətən həyatında heç bir şey dəyişmək istəməyən və ya dəyişməyə qorxan insanlar belə düşünür. İnsanlar sevmədiyi işə getməyə öyrəşir. Onlar üçün maaşdan-maaşa yaşamaq daha yüksək vəzifəyə keçmək üçün bacarıqlarını inkişaf etdirmək və ya yeni peşəyə yiyələnməkdən daha asandır.

Bu tərz düşüncə uğursuzluq qorxusunun əlamətidir. Təəssüf ki, heç olmasa bir az risk etmədən gəlirinizi artırmaq mümkün deyil. Mark Zukerberq deyir ki: “Ən böyük risk heç bir riskə getməməkdir. Sürətlə dəyişən dünyada uğursuzluğa zəmanət verən yeganə strategiya risk etməməkdir”.

Bəs səni pulla bağlı hansı məşhur deyimlər və inanclar qıcıqlandırır? Niyə?